Home | Shona Field Trip

KUSHANYIRWA KWAMAMBO SVOSVE BY: SEE BELOW

Musi wa15 Gunyana 2011 isu vana vemurugwaro rwekutanga vepaWatershed College takakwira madutavanhu ayo akabva ati rongondo akananga kumuzinda kwaMambo Svosve. Donzvo rakange riri rokundodzidza nekuita tsika namagariro edu echivanhu veChiShona.

Takasimuka pachikoro nguva dzesere nechidimbu mangwanani tikasvika mumuzinda waMambo Svosve nenguva dzegumi zuva parainge zvino rati kwirei. Vasikana vainge vakamonera mazambia nemadhuku mumusoro avawo vakomana vakasimira hanzu dzavo dzavanowanzopfeka pavanenge vachienda kumitambo yamasikati. Tichisvika mumuzinda takachingurwa nanevanji waMambo nemukunda wake avo vakazotitungamirira kupinda mumuzinda. Tichiri kumucheto kwechivanze takapfugama muvhu dzvuku vakomana vakachonjomara tichikwidza maoko kumakurukota aMambo ayo akamagamuchidza Mambo. Tichipedza izvi takakotomisa zviso tichipoterera kuenda kuDare raMambo. Dare raMambo Svosve riri kuseri kweimba yavo huru yakavakwa pachizvino zvino.

Muzinda waMambo wakavakirwa pakakwirira pane matombo uye ivhu dzvuku. Musha uyu une dzimba mbiri chete, yandataura pamusoro neimba yekubikira yedenderedzwa yakapfirirwa neuswa. Dare ravo riri pasi pemiti yemitondo uye rina matombo makuru ekuti vanhu vanogara vachinzwa zvinenge zvichibva kudare. Mambo vanenge vakagara pazvigaro zvemazuvano nemachinda avo uye madzimai avo kumberi. Vakazoseka nesu zvavo ishe Svosve vachiti muera tsoko saka nyaya dzavo namatare avo anoitirwa musango kuseri komusha.

Mambo Svosve vakazosvika zvavo papera chinguva munhu wose agara pasi. Vakanga vakapfeka hanzu dzavo dzebasa tsvuku, nyembe nenguwani mumusoro. Vaiteverwa namachinda uye mudzimai mumwe chete. Pamachinda aMambo paivevo nanevanji nemuzukuru waMambo uye vadzidzisi vatatu vechiShona kubva pachikoro cheDhirihori. Muzukuru waMambo anova zvakare Muzvinachikoro wapachikoro ichi anonzi VaMupazviripo. Nevanji waMambo anonzi Tatenda Zenda. Ivo Mambo pachavo vanonzi Lovemore Zenda Svosve. Pamachinda akange aripo ndinorangarira VaRuswa naVaChapendama.

VaMupazviriho ndivo vaiva mukokeri wemusangano wedu naMambo. Mashoko aiturikwa kuna sabhuku Chapendama avo vaimapfuudza kuna VaRuswa ozopfudwa kuna Mambo. Mambo vaitanga vasheedzwa kunzi Jena kwete kuti VaSvosve. Vaisheedzwa kuti Jena seruremekedzo. Jena chidawo chinopiwa vaera tsoko. Vaera Mbizi vanonzi Samaita kana vanaTembo. VanaNyamuziwavo

Takadzidza zvakati kuti maererano netsika dzedu dzechiShona. Chidzidzo chakanangana netsika dzekuroorana dzakasiyana siyana. VaChapendama ndivo vakatanga nyaya iyi vachitsanagura kuti munhu anonzi jaya kana mhandara munhu akaita sei. Mandara musikana asati ave kuziva vakomana uye jaya mukomana asati ave kuziva vasikana. Izvi zvinoreva kuti mukomana kana musikana uyu haasati ava kuziva zvepabonde. Musikana anoroorwa nemukomana waanenge achidanana naye asi zvichizivikanwa navatete vemusikana kana pari patsika yekutizisa. Kutizisa kana kutizira mukumbo itsika ichiri kuitwa mazuvano apo musikana anoperekedzwa natete vake kumukomana zvisingazivikanwi navabereki vake. Vabereki vake vanozoziva kuti mwana wavo ari kupi mushure mokunge sadombo kana munyayi aendesa tsvakirai kuno. Vabereki vemusikana vanozoudza munyayi uyu pfuma kana roora ravanoda pamwana wavo. Vana takapiwa mukana wekubvunza mibvunzo pamusoro petsika dzeChiShona dzainge dzataurwa ipapo kana zvimwevo zvataida kuziva. Mibvunzo yese yakapindurwa zvine unyanzi zvakatigutsa tose.

Mambo vakazosimuka votaura pamusoro poumambo hwavo. Vakatiudza kuti umambo hwavo hwakauya pamusaka pekuti svosve ndiro rakakunda Nzou anova aiva mambo wepasi rose. Svosve akapinda mumhino dzaNzou kareko ndokubva amun’en’ena mukatimo. Neshungu Nzou akazvirovera pamiti napamatombo kusvika apunzika nekuneta uye namarwadzo ekukuvara. VaNzou vedu imi takazongoperezeka ndokuti chonjoma ndiye sarai mudye. Svosve akabuda mumhino dzaNzou ari murwi mukuru pasi rose akabva agadzwa umambo hwepasi rose! Madzimambo anotonga zvichienderana nedzinza ravo. Hazviite kuti munhu ave mambo munzvimbo inenge isiri yedzinza rake. Madzimambo anovigwa muninga uye rufu rwamambo rwakange rwusingazivikanwe nemunhu wese wese

Jena vakatiudzavo nezvenzvimbo dzinoera. Vakati kana ukange uchipfuura munzvimbo dzinoera haufaniri kungobvotomoka kana kurotomoka kungotaura zvinhu zvisina tsarukano. Mumakomo, mumapako nemunzizi ndedzimwe dzenzvimbo dzinoera. Munhu anotadza kuremekedza zvierwa izvi anogona kunyangarika kana kurasika zvokusaziva kwaari kubva kana kuenda.

Rakazoti zvino zuva rorova nhongonya, nzara yave kuchibvunza mutupo pahuro pachiti papata nenyota mukaranga waMambo akasheedza vamwe vedu kuti vatakure migomo yamahewu kuti timbotova pahuro pakange paoma. Vashoma vakadzungudza misoro yavo kuramba komichi dzemahewu dzavaipiwa. Vazhinji vaitoona sevanonokerwa kupihwa komichi dzamahewu.

Musangano wedu naMambo wakazopera tikavatambidza chipo chedu chatakange tauya nacho mipururu nemiridzo ichiridzwa nemunhu wese kuratidza kutenda kwedu. Takaonekana naMambo avo vakativimbisa mombe chaiyo kana tikadzokerako zvekare gore rinouya. Madutavanhu akavhetemeswa tave kudzokera kuchikoro asi tose nyota yedu yokuziva tsika dzedu yakange yapedzerwa patsime mumuzinda waMambo navanasorojena, machinda aMambo

Zvanyorwa naSharon Mavuru

Mwana ari mufomu yokutanga paWatershed College

Sponsored links

	None
	None		None
	None		None